Chegamos ao final. O curso 20/21 non foi sinxelo, e en ocasións ten posto a proba a nosa resistencia e a nosa capacidade de adaptación. Gustariamos de vos agradecer todo o voso traballo e esforzo malia todas as dificultades, así como a vosa constancia pondo en marcha actividades de educación en dereitos humanos.
Chega o momento de comezar a planificar o curso que vén, así que propoñémosvos este calendario con algunhas datas clave, por se vos parece adecuado incluír algunhas nas vosas programacións.
Setembro/outubro de 2021: A finais de setembro deste ano cumpriranse sete anos da desaparición de 43 alumnos de Guerrero (México) por parte de policías e outros membros do estado, e segue sen esclarecerse o crime e sen facerse xustiza. Proporémosvos traballar sobre este caso e a situación de dereitos humanos en México e que os vosos estudantes actúen directamente para pedir xustiza.
Novembro de 2021: Durante este mes, farémosvos dúas propostas, unha vinculada ao 20N, Día internacional da infancia, e outra relacionada co 25N, Día internacional da eliminación da violencia contra a muller. Ambas comporanse de talleres educativos que poderedes pór en marcha na aula e dalgunhas propostas de acción por casos concretos.
Decembro de 2021: Durante este mes poremos en marcha o noso tradicional maratón de envío de cartas ‘Escribe polos teus dereitos’, no que nos uniremos á petición de centos de millares de persoas de todo o mundo para que se respecten os dereitos humanos dalgúns defensores e defensoras de dereitos humanos en diferentes países do mundo.
Xaneiro de 2022: Co gallo do Día escolar da paz e a non-violencia, suxerirémosvos a nosa proposta ‘Regala as túas palabras’, na que os estudantes poderán facerlles chegar palabras de alento e solidariedade a persoas presas de conciencia en todo o mundo.
Marzo de 2022: Arredor do 8 de marzo, Día internacional da muller, realizaremos propostas para traballardes na aula relacionadas cos dereitos humanos da muller, a eliminación dos estereotipos de xénero desde un enfoque de dereitos humanos e a acción por mulleres defensoras de dereitos humanos nalgunha parte do mundo.
Maio de 2022: Con motivo do 17 de maio, Día internacional contra a homofobia, a bifobia e a transfobia, realizaremos propostas educativas relacionadas con diversidade sexual e de xénero, acompañadas dalgunha proposta concreta para actuar a favor do colectivo LGBTI.
Estas propostas serán complementadas con outros materiais e accións que estarán dispoñibles na web da Rede durante o curso. Desexámosvos un feliz verán!