Amnesty Internationaletik ikasgeletan klima-aldaketa lantzeko bi proposamen berri aurkeztu nahi dizkizuegu. Metxeroetako gas-errekuntzaren aurka diharduten neska eta emakumeak biltzen dituen Guerreras por la Amazonía mugimenduaren historian oinarritutako proposamenak dira.
Batetik, manwhakomiki bat dakarkizuegu. Emakume horiek metxeroen aurka gauzatutako borrokaren historia azaltzen du fantasiazko eta abenturazko ukituekin. Manwha Hego Korean sortutako manga marrazki-estilo bat da, eta Ricardo Ishikawa arduratu da ilustrazioak egiteaz.
Bestetik, ikasgelarako plan bat daukagu, zenbait jardueraren bidez ikasgeletan hainbat gai lantzeko, hala nola: klima-aldaketa; bizitza-eskubidea eta ingurune osasuntsuan bizitzeko eskubidea; erregai fosilak; gas-errekuntza petrolioa erauzteko “metxeroetan”; “sakrifizio-eremuak” izenekoak, non biztanleek gas toxikoak arnasten dituzten egunero, etab.
Ikasgelarako planari esker, bideratzaileek behar beste elementu tekniko izango dituzte haurrei hizkuntza egokian aurkezteko gai hauei buruzko informazioa:
Zer den klima-aldaketa.
Ekuadorreko Amazoniako metxeroak: zer den petrolioa, nola funtzionatzen duten petrolio-putzuek eta nola funtzionatzen duten metxeroek.
Nola urratzen dituzten metxeroek giza eskubideak eta natura-eskubideak.
Manwha (komikia) irakurtzea.
Metxeroen kutsadurarako irtenbideak aztertzeko rol-jokoa.
Guerreras por la Amazonía mugimenduari elkartasuna adierazteko ekintza.
Hortaz, helburu nagusia giza eskubideei eta natura-eskubideei buruz ikastea da, arrisku larrian baitaude, metxeroetako gas-errekuntzak berotze globala eta giza eskubideen urraketak sustatzen dituelako. Emakume borrokalari horiek Ekuadorreko Amazonian metxeroen kontra gauzatzen duten aktibismoa ezagututa, ikasleak motibatuko ditugu, elkartasun-ekintzak egin ditzaten “metxeroak itzali eta bizitza pizteko” eta erregai fosilen industriaren hedapena geldiarazteko.
Materialetan ekintzarako proposamenak ere badaude, ikasleak munduko gerlari bihur daitezen, eta ingurumena zaintzeko konpromisoak har ditzaten. Azalduta dago, halaber, zer den auzi estrategikoa eta nola izan daitekeen lagungarria klima-aldaketaren kontra borroka egiteko eta eskubideak babesteko.
Material guztiek oinarritzat dute Amnesty Internationalen ikerketa bat, non azaltzen den Ekuadorrek ez duela betetzen metxeroak ezabatzeko betebeharra, erregai fosilen industriako praktika kaltegarria izan arren.
Amazoniaren alde diharduten emakume borrokalariek bizia arriskuan jartzen dute, eta, erantzun gisa, Ekuadorreko justiziak huts egin die.
Zuen lanak eta ekintzak sare sozialetan parteka ditzakezue, #EliminaLaMecha traola erabiliz.
Emakume borrokalarien alde esku hartzeko unea da!