A educación é un dereito humano, un ben público e unha responsabilidade colectiva. A Asemblea Xeral das Nacións Unidas proclamou o 24 de xaneiro Día Internacional da Educación, en celebración do papel que a educación desempeña na paz e no desenvolvemento.
Sen unha educación de calidade, inclusiva e equitativa para todas as persoas en todos os países, os países non lograrán alcanzar a igualdade de xénero nin romper o ciclo de pobreza que deixa atrasados millóns de nenos, nenas, mozos e mozas e persoas adultas.
A educación é moito máis que adquirir coñecementos académicos. Na escola, os nenos e nenas aprenden habilidades sociais e emocionais. As escolas contribúen a construír comunidades fortes. En tempos de paz, a educación equipa nenos, nenas e persoas adultas coas ferramentas necesarias para seren cidadáns informados e activos. Con todo, en tempos de conflito, a educación adquire un papel aínda máis esencial.
A pesar das perturbacións da guerra, o dereito á educación persiste. Lamentablemente, a educación adoita ser unha das primeiras vítimas da guerra. A educación é unha ferramenta fundamental para protexer nenos, nenas, mozos e mozas, apoderalos e darlles esperanza durante os conflitos e a longo prazo. Axuda as comunidades a fortalecerse, a recuperarse e a traballar para lograr unha paz duradeira.
Propómosche profundar no dereito á educación durante os conflitos armados e as crises, con dúas guías educativas que ofrecen información para profesionais da educación e actividades prácticas para sensibilizar e reflexionar sobre a importancia deste dereito.
Cando?
O 24 de xaneiro ou en datas próximas ao Día Internacional da Educación.
Se non che cadran estes días, podes facer actividades en calquera outro momento do ano.
Que che ofrecemos?
Guía “Educación en zonas de conflito”.
Guía “Educación: un dereito atacado en todo o mundo”.
Usar outros recursos da colección sobre dereito á educación.
Esta proposta é só para centros educativos?
As actividades poden levarse a cabo en calquera espazo educativo: institutos, universidades, asociacións xuvenís, centros culturais, actividades extraescolares…