O obxectivo da Rede de Escolas é facer do centro escolar un espazo de reflexión sobre os nosos dereitos e os dereitos das demais persoas, nun marco participativo e interactivo. Ademais, é unha invitación á comunidade educativa (profesorado, alumnado, persoal non docente, pais e nais) para que se comprometan coa loita polos dereitos humanos, converténdose en verdadeiros activistas.
Que tipo de temas se traballan?
Sempre temas de dereitos humanos, vinculados ás grandes campañas e ás persoas polas que está a traballar Amnistía Internacional. Recibiredes propostas sobre presos/as de conciencia, pena de morte, tortura, dereito á vivenda e á saúde, infancia etc.
Para que serve?
- Denunciar a violación de dereitos humanos no mundo, co fin de mobilizar o profesorado e o alumnado no ámbito educativo.
- Dar a coñecer os temas de traballo prioritarios de Amnistía Internacional no ámbito escolar.
- Xerar unha rede de centros escolares, activistas, profesorado e alumnado que realicen traballo conxunto en defensa dos dereitos humanos.
- Traballar por persoas concretas con nomes e apelidos polas que Amnistía Internacional está a traballar en todo o mundo.
Que che ofrecemos se te dás de alta?
- Facilitamos propostas didácticas para pór en práctica na aula ou no centro educativo no seu conxunto.
- Ofrecemos información actualizada e propostas de accións en redes sociais.
- Fornecemos contido para traballar o tema dos dereitos humanos nas distintas materias que se imparten.
Pertencer á Rede obrígate a algo?
Non. A Rede de Escolas está pensada para que poidas organizarte como queiras, dependendo do tempo de que dispoñas. Darte de alta non supón máis compromiso do que ti mesmo/a te marques.
En que se diferencia a Rede de Escolas de AI doutras redes educativas?
A Rede de Escolas de AI compatibiliza a parte formativa/educativa con propostas de acción concretas sobre casos reais en que traballa a organización. Queremos que estudantes e profesorado afonden en temas de dereitos humanos e ao tempo actúen de forma concreta coas súas sinaturas ou as súas mensaxes sobre leis inxustas ou persoas encarceradas en todo o mundo. A Rede de AI traballa sobre persoas reais que están a sufrir vulneracións de dereitos humanos.
Ídesme bombardear con correos?
Non. Trataremos de che ofrecer propostas de acción, información sobre os casos en que traballa AI e outras cuestións de interese mediante correo electrónico, como máximo cada dúas ou tres semanas.
Cantos temas de traballo propondes durante o curso?
Normalmente propomos 4 ou 5 grandes accións de dereitos humanos durante o curso, que adoitan estar vinculadas a datas clave (p. ex: Día da Muller ou Día dos Dereitos Humanos). Adicionalmente, pode haber propostas de acción sobre casos urxentes (p. ex: persoas condenadas a morte) que poden precisar da nosa axuda nun prazo curto. Participade nas que poidades; calquera axuda que poidades ofrecer será moi ben recibida por estas persoas.
Que apoio podo recibir de Amnistía Internacional?
Dependendo de cal sexa a túa localidade, a capacidade de AI para colaborar contigo e darche apoio variará. Nalgunhas localidades, poderás contar con activistas de AI que che axudarán no teu labor, e noutras non haberá tanta sorte. De calquera xeito, é boa idea que regularmente teñas contacto mediante correo ou teléfono co grupo local de AI máis próximo.
E se teño comentarios que vos facer?
Estaremos encantados de recibilos, axudarvos no que poidamos e cambiar o que sexa necesario para que a Rede mellore. Se tes calquera cousa que nos comentar, fáinola chegar a redescuelas@es.amnesty.org.
E se quero ter un maior nivel de compromiso?
O teu centro pode chegar a un compromiso de maior impacto, creando un Grupo Escolar estable; esta é unha estupenda forma de que rapaces e rapazas menores de idade sexan parte activa dun movemento internacional de recoñecida imparcialidade, que centra a súa loita a prol da defensa dos dereitos humanos en todo o mundo. Os Grupos Escolares están formados por estudantes da ESO ou de bacharelato, supervisados por un membro do profesorado ou da ANPA do seu centro, e contan cun importante apoio por parte da organización no traballo que realizan. Se tes interese en montar un, non dubides en pórte en contacto connosco.
Dedícome á educación non-formal. Ten sentido que me apunte?
Si. Moitas das propostas que realizamos son perfectas por estrutura e duración para seren realizadas en ámbitos de educación non-formal, como escolas de ocio e tempo libre, actividades promovidas por concellarías de xuventude, talleres para adultos etc.
Quero rexistrarme! Como podo facelo?
É moi sinxelo, rexístrate aquí. Loita polos dereitos humanos connosco!!!