Presentámosvos unha nova guía didáctica para o profesorado sobre a situación actual na Faixa de Gaza, marcada pola ofensiva militar israelí iniciada o 7 de outubro de 2023, que é constitutiva de xenocidio.
A guía inclúe un total de catro talleres divididos por intervalos de idade, aínda que os diferentes talles son adaptables a outros cursos.
Os talleres xiran arredor da historia de dous pais, Bassan (ex-miliciano palestino) e Rami (ex-soldado israelí), e a organización Combatentes pola Paz. Ambos os pais viviron a dor máis profunda ao perderen as súas fillas no conflito a mans do outro bando. A pesar de seren combatentes en bandos opostos, transformaron o seu sufrimento nunha mensaxe de esperanza e reconciliación, converténdose en irmáns na loita pola fin da violencia. A súa historia está explicada nos anexos da guía, nos que, ademais, se resumen os antecedentes históricos do conflito.
A medida que se incrementa a idade, os talleres inclúen definicións do que é o xenocidio e o apartheid israelí contra a poboación palestina, incluíndo materiais educativos de apoio, posts e vídeos informativos. Independentemente da idade, todos os talleres están orientados a reflexións grupais. Na maioría dos talleres, ademais, inclúense propostas de acción.
A través da narración, a reflexión e actividades creativas, os alumnos e alumnas explorarán o poder do diálogo, a empatía e o perdón, descubrindo que, mesmo nos momentos máis difíciles, é posible construír un futuro baseado na esperanza, o respecto, a xustiza e a fin da violencia.
Resultados de aprendizaxe (entre outros):
- Desenvolver empatía e comprensión. Os alumnos recoñecerán o impacto do conflito nas persoas involucradas e aprenderán a poñerse no lugar do outro.
- Reflexionar sobre a importancia do diálogo e a reconciliación. Incrementar o aprecio pola cultura do diálogo, o entendemento e a xustiza.
- Comprender como a comunicación e o entendemento poden transformar a dor nunha oportunidade para construír unha vida libre de violencia.
- Identificar formas de promover a convivencia sen conflito.
- Explorar accións concretas que poden aplicar na súa vida cotiá para resolveren conflitos de maneira non violenta, apostando pola empatía, o diálogo e o amor, en lugar do odio e a violencia.
- Adquirir conciencia sobre a gravidade do que ocorre.
- Desenvolver espírito crítico.
- Ter esperanza de que é posible outro mundo, ao que se pode contribuír como cidadáns correntes.
- Coñecer a importancia de cada persoa na consecución dunha convivencia sen violencia.
Esperamos que atopedes estes materiais interesantes. Se tendes algunha consulta ou comentario sobre eles, non dubidedes en escribir a equipo.educacion@es.amnesty.org ou a agalvez@es.amnesty.org
Seguimos!