Todo neno ou nena ten dereito á educación, tal como establece o dereito internacional e, en concreto, a Convención da ONU sobre os Dereitos do Neno. Con todo, este dereito implica algo máis que o mero acceso a unha aula. A educación debe estar dispoñible e ser accesible, aceptable e adaptable. Ademais, debe ser segura. Cando as infraestruturas dunha escola non son seguras ou os nenos e nenas corren perigo —por exemplo, por mor da violencia ou da mala hixiene— resulta imposible realizar o seu dereito á educación.
A historia de Unecebo Mboteni, en Suráfrica, é un exemplo tráxico do que ocorre cando os gobernos non cumpren con ese deber. A súa morte puido evitarse e —o que é aínda máis triste— non se tratou dun caso illado. Ocorreu nun país no que as escolas pecan desde hai tempo de infraestruturas inseguras, aulas masificadas e falta de acceso a auga potable e saneamento.
Neste kit de actividades, atoparás unha introdución aos dereitos humanos, ao dereito á educación e a como as escolas inseguras teñen unha relación cos dereitos humanos. Tomando como base a historia de Unecebo, poderás realizar dúas actividades para reflexionar acerca destes contidos.
Resultados de aprendizaxe:
Comprender o concepto de dereitos da infancia e protección dos nenos e as nenas na educación.
Describir as repercusións dunha violación do dereito á protección na escola sobre outros dereitos.
Entender que os gobernos teñen a responsabilidade de garantir a seguridade nas escolas.