Desde Amnistía Internacional presentamos dúas novas propostas para tratar o cambio climático nas aulas, todas elas baseadas na historia das Guerreiras pola Amazonia contra a queima de gas nos chamados “mecheros”.
Por unha parte, unha banda deseñada de tipo manwha que explica a historia e a loita das Guerreiras contra os “mecheros” cun aire fantástico e de aventura. O manwha é un estilo de debuxo manga procedente de Corea do Sur, e as ilustracións correron a cargo de Ricardo Ishikawa.
Por outra parte, un plan de clase no que se presentan varias actividades para levar ás aulas diferentes cuestións: cambio climático, dereito á vida e a un ambiente san, combustibles fósiles, queima de gas no que se coñece como “mecheros” para a extracción de petróleo, as chamadas “zonas de sacrificio”, onde as persoas respiran diariamente gases tóxicos etc.
O plan de clase proporciónalles ás persoas facilitadoras os elementos técnicos necesarios para presentar, nunha linguaxe adecuada para nenos e nenas, información arredor dos seguintes temas:
Que é o cambio climático.
Os “mecheros” na Amazonia de Ecuador: que é o petróleo, como funciona un pozo petroleiro e como funciona un “mechero”.
De que forma os “mecheros” violan os dereitos humanos e da natureza.
Lectura do manwha (banda deseñada).
Xogo de roles para explorar solucións á contaminación dos “mecheros”.
Chamada á acción en solidariedade coas Guerreiras pola Amazonia.
O grande obxectivo é, por tanto, aprender sobre os dereitos humanos e da natureza, que están en grave perigo pola contribución ao quecemento global e a violacións de dereitos humanos da queima de gas en “mecheros”. Por medio da historia das Guerreiras e o seu activismo contra os “mecheros” na Amazonia ecuatoriana, buscarase motivar os e as estudantes a tomaren accións en solidariedade para esixir “quese eliminen os ‘mecheros’ e que se acenda a vida”, e que se deteña a expansión da industria dos combustibles fósiles.
Os materiais inclúen tamén propostas de acción para que os e as estudantes se convertan en guerreiras e guerreiros do mundo, así como para asumir compromisos sobre o coidado do medio ambiente. Mesmo se explica, de maneira moi accesible, o que éo litixio estratéxico e como este pode contribuír áloita contra o cambio climático e áprotección de dereitos.
Todo isto baséase na investigación de Amnistía Internacional sobre o incumprimento de Ecuador de eliminar os “mecheros”, unha práctica perniciosa da industria dos combustibles fósiles.
As Guerreiras pola Amazonia están a arriscar a súa vida na súa loita, e, como resposta, a xustiza ecuatoriana decidiu fallarlles.
Podedes compartir os vosos traballos e accións por redes sociais utilizando o cancelo #EliminaLaMecha.
É hora de actuar polas Guerreiras!