Gutunen maratoia abenduaren 10ean egingo da, Giza Eskubideen Nazioarteko Egunean. Mundu mailako mobilizazio honetan, gutunak, marrazkiak, sinadurak eta postalak bidaltzen zaizkie munduko herrialde desberdinetan bidegabekeriak jasaten ari diren pertsonei, beren egoera hobetzeko. Urtero, Amnesty Internationalen Hezkuntza Sarearen une hunkigarrienetako bat bihurtzen da, milaka ikaslek gogotsu parte hartzen baitute ekintzetan.
2023. urteko maratoia, gainera, Giza Eskubideen Aldarrikapen Unibertsalaren 75. urteurrenean egin zen, eta aukera bikaina izan zen pertsona guztien askatasunak eta bermeak zeintzuk diren ezagutarazteko haur eta nerabeei. Hona hemen edizio honetako lorpen batzuk:
Gutunen maratoia jarri zen abian 66 herrialdetan.
Gutxienez 5.828.323 ekintza egin ziren mundu osoan.
Ia 1,4 milioi pertsona mobilizatu ziren mundu osoan.
Hezkuntza Sarean mobilizatzeko arrazoi izan genituen pertsona batzuen hitzak iritsi zaizkigu, eta zuekin partekatu nahi ditugu, zuen ikastetxera helarazi ahal izateko. Eskerrik asko haiei babesa emateagatik!
1. Espainiako eta beste herrialde batzuetako milaka elkartasun-mezu entregatu zitzaizkion, abokatuen bitartez, Rocky Myers gazteari. Eta Myersek Amnesty Internationali eskerrak eman zizkion txartel asko jaso zituelako.
2. Oraingoz, ez da aurrerapenik izan Justyna Wydrynskaren kasuan. Hala ere, mundu mailako elkartasunak eragin oso positiboa izan du harengan, oso babestuta sentitu baita, eta horrek indar eta konfiantza handiagoa eman dizkio. Justynak honako hau esan zuen:
“Poloniako Amnesty Internationalen bulegora iritsi berri naiz eta milaka gutun zeuden gelara joan naiz. Eskerrak eman nahi dizkiet idatzi didaten pertsona horiei guztiei. Eskerrik asko. Niretzat asko esan nahi du horrek. Gutun guztiak bihotzera iritsi zaizkit.”
3. Maung Sawyeddollah moralki oso babestuta sentitu zen, bereziki segurtasun-arriskuei aurre egin zien hilabete zailetan. Sawyeddollahk kanpainan izan zuen esperientziari buruzko mezua idatzi zuen:
“Maung Sawyeddollah naiz, Myanmarrekoa. (…) ez nekien nire ahotsa mundu osoan entzungo zenik, Amnesty Internationalen plataforma izugarriari esker. Kanpainak mezua handitzeko bide ahaltsua eman zuen. Horren bitartez, mundu osoko pertsona eta taldeen motibazio, babes, kemen eta elkartasun handia jaso dut. Komunitate globalaren erantzunak adore handia eman zidan, jatorri desberdinetako pertsonak batu zirelako justiziaren eta giza eskubideen aldeko borrokan.”