Este ano, o lema das reivindicacións do Orgullo LGBTI será “Educación, dereitos e paz: Orgullo que transforma”. Escolleuse este lema co obxectivo de reclamar a implantación da Educación en Diversidade de maneira xeneralizada como vehículo para combater a LGBTIfobia e reivindicar a implantación das leis LGBTI estatais e autonómicas, fronte aos retrocesos que poden producirse nalgunhas comunidades autónomas.
Amnistía Internacional cre que a educación en dereitos humanos é fundamental para abordar as causas subxacentes das violacións destes dereitos. Creando un contorno propicio ao pensamento crítico, dámoslles espazo ás persoas para que reflexionen sobre os seus propios valores e actitudes e, en definitiva, modifiquen a súa propia conduta. Serve para previr os abusos contra os dereitos humanos, combater a discriminación, promover a igualdade e fomentar a participación da xente nos procesos de toma de decisións.
Por iso, animámosvos a unirvos a esta reivindicación no mes de xuño coas seguintes propostas:
1. Realizar unha charla, organizar un taller ou facer un debate co material educativo “Orgullo de ser”. Tendes actividades á vosa disposición para Educación Primaria e Educación Secundaria, así como moita información complementaria: conceptos básicos, historia LGBTI, discursos de odio...
2. Pórvos en contacto con organizacións LGBTI da vosa localidade, que posiblemente teñan experiencia facendo talleres en centros educativos e poidan achegar testemuños directos. Na web da Federación Estatal LGBTI+ encontraredes un mapa coas 57 entidades federadas. Tamén podedes visitar a Fundación Triángulo, con varias sedes en varias comunidades autónomas.