En todo o mundo hai moitas persoas que están a percibir cambios profundos na súa sociedade. Hai comunidades inmersas nunhas divisións ou nunha inestabilidade cada vez maiores.
En tempos como estes, vólvese máis fácil para dirixentes políticos e outras persoas poderosas infundir medo e aproveitar as diferenzas, crear divisións entre comunidades e protexer os seus propios intereses. Eses discursos do medo son unha ferramenta poderosa. Permítenlle a quen exerce o poder xustificar medidas extremas que utiliza para restrinxir as liberdades, reescribir as normas, eludir a rendición de contas e concentrar o poder en grupos privilexiados. Así é como comeza a erosión dos dereitos humanos, ás veces de maneira soterrada e outras abertamente.
Os dereitos humanos e as liberdades que garanten non son privilexios nin temas de debate político, son os cimentos das sociedades pacíficas e xustas. Desde o dereito á educación e á igualdade ata o dereito a solicitar asilo e a recibir un trato digno, estes dereitos son para todas as persoas en todas as partes. Os dereitos humanos non son opcionais.
Esta guía está dirixida a calquera persoa que queira entender o modo en que as tácticas do poder autoritario poden silenciar, dividir ou exercer control. Non trata sobre que filiación política ou sistema de goberno é mellor. Tenta entender como se empregan politicamente o medo e a división, como se manipulan os discursos para xustificar prácticas autoritarias e como podemos comezar a cuestionar os sistemas e os relatos que facilitan o aumento da inxustiza.
Resultados de aprendizaxe:
- Coñecer e entender como se relacionan as prácticas autoritarias coa erosión dos dereitos humanos na actualidade e como afectan especialmente determinados colectivos.
- Tomar consciencia da importancia dos dereitos humanos e entender que son universais, para todas as persoas e en todos os países do mundo.
- Reflexionar sobre que papel activo temos para loitar contra os discursos de odio, especialmente na redución de espazos da sociedade civil.