A emerxencia climática é unha das maiores crises de dereitos humanos do noso tempo. Para abordala en centros educativos, compartimos dous novos materiais de Amnistía Internacional que axudan a conectar a crise climática cos dereitos humanos, a xustiza climática e a participación cidadá.
Abandono gradual dos combustibles fósiles xusto e equitativo. Documento explicativo e recursos para facilitadores
Inclúe:
- Unha gran variedade de claves e actividades para comprender como a produción e o uso de carbón, petróleo e gas afectan o clima, a saúde, o ambiente e os dereitos das comunidades máis expostas.
- Toda a información necesaria para facilitadores/as.
Actividades educativas específicas sobre como as grandes empresas petroleiras e gasistas utilizan operacións de desinformación para moldear o discurso sobre a auténtica gravidade da emerxencia climática e, así, contribuír a atrasar a adopción de medidas eficaces contra o cambio climático.
As actividades propostas teñen diferentes duracións (desde vinte minutos ata unha hora, pasando por actividades de corenta minutos), para que poidades combinalas como mellor consideredes.
Espazo cívico e defensores e defensoras dos dereitos ambientais: esenciais para lograr a xustiza climática
- Trátase dun documento fundamentalmente informativo que pon o foco nas persoas que se mobilizan para protexer o planeta e os dereitos humanos.
- Explica por que as liberdades de expresión, asociación e reunión pacífica son esenciais para a xustiza climática, e mostra os riscos que afrontan moitas persoas defensoras ambientais: criminalización, intimidación, ataques e restricións á protesta...
Ambos os materiais permiten traballar co alumnado cuestións como a responsabilidade histórica na crise climática, o impacto desigual do cambio climático, a transición enerxética xusta, o dereito a protestar e o papel das comunidades afectadas.
Tamén inclúen preguntas de reflexión, casos reais e propostas para o debate e a acción. Ademais, inclúen información sobre os diferentes cursos en liña sobre cambio climático, transición enerxética xusta, defensores e defensoras de dereitos humanos, dereito á protesta etc. da Academia de Dereitos Humanos de Amnistía Internacional.
Con estes recursos queremos acompañar os centros educativos na tarefa de formar unha cidadanía crítica, informada e comprometida coa defensa dos dereitos humanos e dun futuro máis xusto, sostible e habitable para todas as persoas.
Esperamos que os desfrutedes. Para calquera dúbida ou comentario, podedes escribir a equipo.educacion@es.amnesty.org ou redescuelas@es.amnesty.org
Seguimos!