Israel imponlle un sistema de opresión e dominación á poboación palestina en todas as zonas que están baixo o seu control —en Israel e nos TPO— e ás persoas refuxiadas palestinas, a fin de beneficiar a poboación israelí xudía. Isto constitúe apartheid e está prohibido polo dereito internacional.
Na acción “Derruben o apartheid, non as vivendas” é fundamental dar a coñecer o que é o apartheid e a forma en que Israel mantén un sistema de opresión racial e dominación sobre a sociedade palestina. Para iso, ofrecémosvos unha presentación coa definición de apartheid, os elementos que inclúe o apartheid, datos e cifras actualizados e un vídeo que podedes proxectar na aula.
Como complemento á presentación, dámosvos varias ideas para mobilizardes o alumnado:
1. Proxectar a imaxe do muro dentro da aula ou nalgún lugar ou espazo por onde pasen moitas persoas. Pode deixarse a proxección de forma fixa, para que todo o mundo coñeza a mensaxe, ou facer algunha actividade coa imaxe. Dámosvos algunhas ideas:
pedir que escriban mensaxes en post-its y pegalos enriba ata que o muro quede tapado
facer fotografías xunto ao muro e colgalas en redes
facer unha rolda acerca do que lles fai sentir o que lles suxire o muro
outras ideas que se vos ocorran
Podedes descargar a imaxe aquí.
2. Construír un muro, que simboliza a fragmentación, a segregación, a discriminación e a privación que actualmente sofre a poboación palestina. Pódese usar material de reciclaxe (caixas de cartón, briks, paneis de exposición etc.) ou elementos dispoñibles no centro educativo. Nun momento dado, as persoas presentes poden tombar o muro, mostrando como queremos acabar co apartheid.
3. Graffitis contra o apartheid, pintándoos nalgún muro do centro, preferiblemente no exterior. Esta acción chama especialmente a atención se contades con Bacharelato de Artes ou estudos de FP relacionados con deseño e artes gráficas. Trátase de deseñardes un que faga visible o apartheid e mais o cancelo #ApartheidIsraelSTOP
4. E, ademais, para persoas maiores de 16 anos...
Asinar a ciberacción: cantas máis persoas actúen, máis forza teremos para acabarmos co apartheid.
Difundir a ciberacción por Whatsapp e en redes sociais, para que participen máis persoas e lograr maior impacto.
Facer vídeos e fotos en TikTok e Instagram coas mensaxes da acción e incluíndo o cancelo #ApartheidIsraelSTOP