Para as autoridades israelís, todo o que vén de Gaza é considerado unha ameaza. Mesmo se son xoguetes, como por exemplo globos ou papaventos. Xogar é un dereito da infancia recollido na Convención dos Dereitos do Neno proclamados pola ONU en 1989.
A finais de agosto de 2026, o Consello de Ministros israelí afirmou que os globos e papaventos que os nenos e nenas voan na Faixa de Gaza serán considerados drons militares e ameazou con tomar medidas militares. Algún ten cruzado a liña amarela -onde permanecen as tropas israelís- e mesmo a fronteira con Israel.
Cando se cumpre un ano do acordo de cesamento do fogo, o xenocidio israelí en Gaza continúa. O exército ocupa ao redor do 60% da Faixa e máis de 1300 persoas palestinas morreron como consecuencia dos ataques. Desas 1300 persoas, case 300 (270) son nenos e nenas.
Mentres os nenos e as nenas gazanos tratan de recuperar a súa vida, Israel cre que un papaventos é un perigo. Esta decisión quítalles a posibilidade de atopar mínimos momentos de alegría. O xenocidio negoulles a infancia.
Nesta ligazón podes ver imaxes sobre o tema, e na páxina “ Stop genocidio de Israel en Gaza” podes ampliar a información sobre a situación actual e as peticións de Amnistía Internacional.
Queremos mobilizar centos de nenos, nenas e adolescentes nunha acción sinxela para mostrar solidariedade e lembrar que xogar é un dereito en todos os lugares do mundo. Tamén podes implicar persoas adultas na acción.
Cando?
- Entre os meses de outubro e decembro de 2026.
Que che propomos?
- Explicar cales son os dereitos da infancia. Tes á túa disposición unha presentación aquí e máis recursos educativos na colección sobre infancia.
- Construír papaventos sinxelos parecidos aos que aparecen no reel de Instagram e escribir neles mensaxes de apoio dirixidos a nenos e nenas que viven na Faixa de Gaza.
- Botar a voar os papaventos no patio do centro educativo, na praza máis grande da cidade ou en calquera espazo público onde poidan velos moitas persoas. Despois poden colgarse na aula, no vestíbulo do centro ou noutros espazos comúns.
- Realizar fotografías e vídeos da acción (nos que se vexan ben as mensaxes escritas) para envialos por correo electrónico aredescuelas@es.amnesty.org
- Compartir imaxes nas vosas redes sociais co cancelo #jugaresunderecho etiquetando a @amnistiaespana
Esta proposta é só para centros educativos?
- Polas súas características, esta acción é especialmente adecuada para realizar en espazos de lecer e tempo libre: asociacións xuvenís, escolas de tempo libre, asociacións de barrio, centros culturais, actividades deportivas, campamentos de fin de semana…