Máis dun centenar de estudantes e profesores/as de nove centros educativos valencianos reuníronse o 30 de marzo en Valencia para tratar sobre Migración e DD. HH.
Ningún ser humano é ilegal
Co lema Cap ésser humà és il·legal (“Ningún ser humano é ilegal”) desenvolveuse a IV Trobada de Joves Activistes (Encontro de activistas novos) de Amnistía Internacional València.
A xornada abordou desde diferentes frontes o debate sobre “Migración e DD. HH.” co obxecto de dialogar sobre os contidos e animar a unha actitude comprometida e proactiva na defensa da migración como dereito humano.
Tras o saúdo e a benvida iniciais, o alumnado participante foi presentando os seus centros educativos e realizando unha breve descrición dos proxectos que neles desenvolven.
A continuación, presentouse un primeiro relatorio marco, co obxecto de defender a migración como dereito humano e reflexionar sobre o xeito en que, de forma interesada, está a presentarse a migración no debate político; sobre como elaboramos a nosa percepción da migración e sobre por que interesa unha percepción problemática dela. Finalmente, defendeuse a necesidade do pensamento crítico e do activismo para afrontar esta conxuntura social e política.
Traballo en alianza
Despois do descanso, levouse a cabo unha mesa redonda titulada Olladas á migración, coa participación de diferentes organizacións que traballan con poboación migrante: València Acull, CEAR e Bella África. No desenvolvemento da mesa debateuse sobre as dificultades que encontra a poboación migrante e destacáronse tamén os logros que se puideron conseguir.
Avanzada xa a mañá, realizouse a actividade Biblioteca Humana: historias de vida de persoas migrantes. Grazas á colaboración do Grupo de Mujeres Yemayá, os participantes na Trobada, organizados en seis grupos, puideron escoitar os testemuños de persoas migrantes e, a continuación, dialogar con elas sobre as circunstancias que explican os seus itinerarios vitais. Foi unha actividade moi emotiva que, ademais, permitiu a interacción entre alumnado de diferentes centros educativos.
Para rematar, o alumnado leu o Manifesto da IV Trobada como colofón e conclusión ás ideas expostas ao longo da xornada.
A foto de familia dos asistentes pechou o acto co berro unánime do slogan da Trobada: Cap ésser humà és il·legal
Asistentes á IV Trobada reunidos formando unha roda
A importancia do activismo xuvenil na defensa dos dereitos humanos
A participación de mozos e mozas e estudantes no activismo é fundamental para construír un mundo máis xusto e solidario. A súa ollada crítica, a súa enerxía e o seu compromiso agregan forza ás loitas sociais e axudan a lles dar visibilidade a inxustizas que moitas veces pasan desapercibidas. Involucrarse na defensa dos dereitos humanos non só transforma a realidade; tamén fortalece valores como a empatía, a igualdade e a xustiza.
Cando a mocidade e o estudantado alzan a voz, o cambio tórnase posible.
Seguimos!