QUE FAGO SE TEÑO POUCO TEMPO? E SE TEÑO MÁIS?

Primeiros pasos. Que podo facer se teño pouco tempo?

  • Se es titora ou titor, aproveita estas horas para traballar os dereitos humanos. Para iso podes usar calquera dos materiais da Rede de Escolas polos Dereitos Humanos de Amnistía Internacional.
  • Inclúe algo sobre dereitos humanos nos temas que impartes. Nesta ligazón podes encontrar propostas sinxelas por materias.
  • Leva á aula persoas que traballen polos dereitos humanos. Isto pode dar unha perspectiva diferente e presenta unha novidade entre o alumnado. Para iso, é interesante que teñas contacto regular co grupo de Amnistía Internacional máis próximo; en ocasións, organizamos visitas de defensores/as de dereitos humanos.
  • Pon en marcha algunha actividade: recollida de sinaturas, envío de mensaxes de solidariedade..., ou realiza unha acción sobre algunha persoa pola que Amnistía Internacional estea a traballar. Revisa a web da Rede de Escolas para encontrares accións ou escríbenos a: redescuelas@es.amnesty.org.
  • Escolle unha data clave (10 de decembro, Día dos Dereitos Humanos; 8 de marzo, Día Internacional da Muller; 30 de xaneiro, Día Escolar da Paz e a Non-violencia etc.) e propón algunha actividade relacionada.
  • Coloca unha copia da Declaración Universal na aula e realiza algunha actividade de reflexión e de compromiso sobre ela a partir da nosa unidade didáctica sobre a Declaración.

Para teres en conta...

  • En calquera caso, proponte que a aula sexa un espazo onde os dereitos humanos prevalezan: respecto entre o alumnado, escoita mutua, reflexión crítica etc. Seguro que sabes perfectamente como potenciar todo isto e relacionalo coa Declaración.
  • Primeiro, decide o que pode interesar ao alumnado e a data que é máis adecuada. Podes facer unha pequena lista e que a voten. Fai que os dereitos humanos sexan parte da súa vida!
  • Mira se algunha das propostas que facemos encaixa neste esquema. Comeza polo más sinxelo para ti, que non che complique a vida. Tenta que o alumnado se interese, mesmo que o preparen polo menos parcialmente.
  • É mellor comezar por actividades máis lúdicas e observar a resposta. É fundamental que non crean que os dereitos humanos son algo aburrido. É preferible rebaixar as nosas expectativas ou a complexidade dos temas para que “entren ben”; incluso poden divertirse. Xa haberá tempo de afondar, de ver temas menos atractivos e de que asuman protagonismo preparándoos eles mesmos.

Teño maior dispoñibilidade. Que podo facer?

  • Pon en marcha un grupo escolar! Para iso, revisa o capítulo anterior e as indicacións dispoñibles na web da Rede de Escolas.
  • Tenta coordinarte con profesores/as para propores unha actividade de forma conxunta. O ideal é que todo o centro se involucre nalgunha proposta que inclúa sensibilización e unha chamada á acción.