Contigo, unha acollida digna!: mostra a túa solidariedade e o teu cariño a adolescentes que chegaron a Canarias

Idade recomendada: 16+

Hai moitos nenos, nenas e adolescentes menores de 18 anos que chegan a España sen axuda nin coidado dunha persoa adulta.

Detrás destas persoas agáchase a realidade de millares de rapaces e rapazas que se ven forzados a abandonar os seus fogares fuxindo de situacións de pobreza, conflitos armados e graves vulneracións dos dereitos humanos. A pesar da súa curta idade, percorren as mesmas rutas migratorias que as persoas adultas e enfróntanse a múltiples violacións dos seus dereitos en travesías que, nalgúns casos, poden durar meses e mesmo anos.

A pesar das dificultades, non se renden. Estes menores emprenderon a travesía máis dura da súa vida para alcanzaren un futuro, para poderen valerse por si mesmos. Malia a súa xuventude, son todo un exemplo de resiliencia e valentía. A súa vontade de saír adiante e contribuír á comunidade é admirable e fainos esperar un futuro mellor.

Que che propomos?

Desde Amnistía Internacional e Radio ECCA queremos contribuír a unha vida mellor e máis digna destes rapaces e rapazas, e a que se respecten os seus dereitos humanos. Moitas veces, a adaptación ao chegar non é sinxela, polo que vos propomosescribir mensaxes de solidariedade, que nalgúns casos se converterán en correspondencia, entre estudantes do teu centro escolar e adolescentes migrantes que participan no programa CONTIGO de Radio ECCA.

Como poñer en marcha a acción?

1. Cóntalles a proposta aos teus estudantes. Se tendes oportunidade, dedica algunha sesión previa sobre o tema das migracións, as persoas migrantes e as persoas menores estranxeiras non acompañadas. Na sección de ligazóns podes encontrar algunhas ideas.
2. Pídelles que escriban cartas a man e en castelán pensando nestes rapaces/zas que se ven obrigados a abandonar os seus fogares para chegar a outro país. Unha boa idea é preguntarlles como están, como é o lugar do que veñen ou cales son os seus desexos.
3. A creatividade está permitida. As cartas pódense acompañar con debuxos ou cores, mais non esquezades que tamén haxa texto. Un dos obxectivos da acción é colaborar na aprendizaxe do idioma dos/as menores estranxeiros.
4. Ponde como remitente o centro e o/a profesor/a responsable, de forma que despois poida establecerse a correspondencia.
5. Facede chegar as cartas a calquera destes enderezos de contacto de Radio ECCA,  co asunto: “Programa  CONTIGO 2022, Actividad: ¡Contigo, una acogida digna!”. Desde alí encargaranse de facer distribución aos/ás adolescentes que participan no programa CONTIGO 2022 e de traballar a correspondencia de volta con eles/as.

• Gran Canaria: Radio ECCA, Fundación Canaria. Av. Escaleritas, 64, 1º, 35011 Las Palmas de Gran Canaria, Las Palmas
• Tenerife: Radio ECCA, Fundación Canaria. C/ Gurmensindo Robaina Galván, 4, 38005 Santa Cruz de Tenerife.
• Lanzarote: Radio ECCA, Fundación Canaria. C/ Coronel Bens, 6, local bajo, 35500 Arrecife. Las Palmas
• Fuerteventura: Radio ECCA, Fundación Canaria. C/ Dr. Fleming, nº1, 35600 Las Palmas

1. Mandádenos fotos se facedes escritura colectiva de cartas ou mensaxes! Lembrade que se se ven caras de menores de idade, precisaremos de autorizacións para poder difundilas. Podedes envialas a redescuelas@es.amnesty.org 
2. A actividade poderá levarse a cabo inicialmente durante todo o curso 21/22. Recomendámosvos que as primeiras cartas cheguen a partir do 30 de xaneiro de 2022 e nunca despois do 15 de xuño de 2022.

NOTA IMPORTANTE:A maioría dos rapaces que participan nos proxectos de ECCA teñen 16 ou 17 anos, polo que cremos que o mellor xeito de que se establezan intereses comúns e conexión é con estudantes de 4.º de ESO e 1.º e 2.º de BACHARELATO. Iso non impide que o alumnado de cursos inferiores poida participar e mostrar solidariedade, mais establecer correspondencia pode que sexa máis complicado.

Ligazóns con información de interese:

Programa CONTIGO de Radio ECCA

Problemas a los que se enfrentan los MENAS. Desmontando bulos

Propostas educativas complementarias:

BD ‘Dos viajes por una vida mejor’

Test sobre persoas refuxiadas (a través da plataforma Kahoot)

Se fose unha persoa refuxiada, como sería a miña vida?:xogo sobre o tránsito dunha persoa refuxiada

Dereitos humanos das persoas refuxiadas: conxunto de talleres

Sobre Radio ECCA

Comezou a emitir en Gran Canaria a mediados dos anos sesenta (e nas súas orixes dedicouse á alfabetización a través da formación a distancia). Radio ECCA ten un sistema educativo para adultos propio, ao que denominaron Sistema ECCA, que se basea na sincronización do material pedagóxico, a clase gravada (radiofónica ou a través de internet) e a titoría presencial ou telemática. Actualmente é unha institución educativa, comunicativa e de acción social que ofrece máis de catrocentas accións educativas que abranguen campos tan diferentes como as tecnoloxías, a educación básica, o bacharelato, idiomas, a intervención familiar, o tempo libre, a saúde ou o medio ambiente.

Sobre Amnistía Internacional

É un movemento global de máis de 10 millóns de socios, socias, activistas e simpatizantes que loitan por unha humanidade xusta e libre en que todas as persoas vivamos con dignidade. É independente de todo goberno, ideoloxía política, interese económico ou credo relixioso, e o seu traballo baséase na investigación e o activismo.