Como cada 10 de decembro, Día Internacional dos Dereitos Humanos, propoñémosvos unirvos á maior recollida mundial de cartas e mensaxes de solidariedade, que decorrerá en 150 países para actuar por defensores e defensoras de dereitos humanos de todo o mundo. Coa acción conxunta de millóns de cartas, sinaturas e mensaxes de solidariedade, actuando sobre persoas concretas que precisan de axuda, conseguimos mellorar a vida dalgunhas destas persoas.
Ademais, este ano cúmprense 75 anos da Declaración Universal dos Dereitos Humanos, o que nos ofrece a oportunidade para reflexionar sobre a importancia do documento máis traducido a nivel mundial e darlles a coñecer a nenos, nenas e adolescentes cales son as liberdades e garantías para todas as persoas no mundo.
Durante os meses de decembro de 2023 e xaneiro de 2024 propoñémosvos actuar a favor de:
Maung Sawyeddollah, que se enfronta a Facebook polo seu papel nas atrocidades de Myammar.
Justyna Wydrzyńska, procesada en Polonia por defender o aborto sen riscos.
Ahmed Mansoor, entre reixas en Emiratos Árabes Unidos por dicirlle a verdade ao poder.
Rocky Meyers, no corredor da morte en Estados Unidos.
- Virginia Laparra, fiscal anticorrupción encarcerada en Guatemala.
Para participardes no maratón de cartas, propoñémosvos a continuación os pasos que debedes seguir:
1. Accedede á presentación interactiva, onde explicamos éxitos conseguidos en anos anteriores, e máis detalles de como funciona o maratón de cartas e de como cambiar a vida das persoas polas que nos mobilizamos a nivel mundial. Podedes proxectárllela ou distribuírllela ás persoas participantes.
2. Difundide información do maratón. Podedes usar os pósters que vos facilitamos, ou propoñer que se elaboren murais e debuxos sobre as persoas mencionadas antes e poñelos nalgún lugar visible para todo o mundo (lugares de paso, entrada, cafetaría, biblioteca etc.).
3. Realizade actividades sobre a Declaración Universal dos Dereitos Humanos, usando o material educativo que vos ofrecemos, con varios recursos educativos que podedes descargar (pasaporte e mapa dos dereitos humanos, kahoot sobre a Declaración e vídeos complementarios).
4. Actuade por unha ou varias das persoas para vos unir ao maratón. Hai varias opcións: escribir cartas, realizar debuxos, escribir mensaxes de solidariedade... Escollede aquelas que vos encaixen mellor!
5. Enviádenos fotos e vídeos das accións que fagades a redescuelas@es.amnesty.org; queremos facer un vídeo para mostrar toda a mobilización que houbo polo maratón na Rede Educativa.
Podedes descargar todos os materiais necesarios nesta ligazón