A emerxencia climática xa forma parte do noso presente. Vemos a súa existencia en ondas de calor récord, en inundacións cada vez máis frecuentes, en incendios cada vez máis destrutivos, en tormentas cada vez máis extremas e na perda acelerada dos glaciares. Cada décima que se avanza cara ao límite dos 1,5 graos de aumento de temperatura media global respecto a niveis preindustriais achéganos a desencadear múltiples ameazas climáticas con repercusións súbitas, irreversibles e perigosas para a humanidade.
No entanto, tamén hai motivos para a acción e a esperanza: comunidades que restauran ecosistemas, mozos que reclaman xustiza climática, enerxías limpas que transforman as nosas contornas e alternativas sostibles que xa están a demostrar que é posible vivir doutro xeito. Desde Amnistía Internacional queremos seguir avanzando no camiño da acción, da esperanza e da xustiza climática. Fronte ao cambio climático, a educación en dereitos humanos permite pasar da preocupación á acción: comprender, cuestionar e mobilizarse para protexer as persoas e o planeta.
Por iso, propómosvos diferentes actividades e accións para que poidades escoller a que máis vos interese traballar no contexto do Día Internacional do Medio Ambiente, que anualmente se celebra o 5 de xuño.
Xustiza climática e emerxencia na aula: novos recursos para educar en dereitos humanos
Dous novos documentos, que inclúen:
- Unha gran variedade de claves e actividades para comprender como a produción e o uso de carbón, petróleo e gas afectan o clima, a saúde, o ambiente e os dereitos das comunidades máis expostas.
- Toda a información necesaria para facilitadores/as.
- Actividades educativas específicas sobre como as grandes empresas petroleiras e gasistas utilizan operacións de desinformación para moldear o discurso sobre a auténtica gravidade da emerxencia climática e, así, contribuír a atrasar a adopción de medidas eficaces contra o cambio climático.
Tendes máis información nesta ligazón
Kit sobre xustiza climática e dereitos ambientais
Neste kit de actividades atoparedes unha introdución aos dereitos humanos, ao concepto de xustiza climática e á responsabilidade de gobernos e empresas de impedir danos ambientais e protexer os dereitos da poboación. Inclúe tres actividades para reflexionar acerca destes contidos, que axudarán a:
- Explorar a relación entre os dereitos humanos e a protección do noso planeta e o noso medio ambiente.
- Recoñecer as ameazas ás que se enfrontan as persoas que defenden os dereitos ambientais.
- Comprender como a inxustiza climática e ambiental agrava as desigualdades.
Tendes máis información nesta ligazón.
Materiais de ‘Guerreras por la Amazonía: contra los monstruos de fuego’
Por unha parte, un cómic de tipo manhwa que explica a historia e a loita das Guerreras contra os “mecheros” con toques fantásticos e de aventura. O manhwa é un estilo de debuxo manga procedente de Corea do Sur, e as ilustracións correron a cargo de Ricardo Ishikawa.
Por outra parte, un plan de clase en que se presentan varias actividades para levar ás aulas diferentes cuestións: cambio climático, dereito á vida e a un ambiente san, combustibles fósiles, queima de gas no que se coñece como “mecheros” para a extracción de petróleo, as chamadas “zonas de sacrificio” onde as persoas respiran diariamente gases tóxicos etc.
Os materiais inclúen tamén propostas de acción para que os e as estudantes se convertan en guerreiras e guerreiros do mundo, así como para que asuman compromisos sobre o coidado do medio ambiente.
Tendes toda a información nesta ligazón.
Esperamos que poidades desfrutar destas propostas.
Seguimos!